Dɛsaʋn 'a kpɛ ‑ɩa 'sraa nyɔ ɔ ‑sa a
5
‑Bo nyɔ 'je ‑tɩ' 'a ‑ta 'de ʋʋ dɔ ɔ 'jeɛ ɛɛ' -pʋn" -tɩ 'tmu, ‑wɛe ɔ "muu ɛɛ' tɔ' ‑tɩ wɔn, 'de ɔ seɛ 'tmʋ ɛ, ‑mɛ ɛɛ' dɛsaʋn nɩɛ 'de ɔ "jru. 2 ‑Bo nyɔ jrɔ' seɛ ‑kwlɩ" ‑te' -wɛe ɔ bla dɛ -sea i -kwɛ "i, 'de ɔ 'je nmi jrɛ' -sea i -kwɛ 'ɛ "ku "i bla, ka 'kwladi nmi nɩa, ka ‑kwlɔ nmi nɩa, -jɩ ‑a cnia pɛɛ- ke, 'de ‑ɩ sea i ‑kwɛ, ‑mɛ ɔɔ' nyɔ tu se i ‑kwɛ ‑wi" ‑wee' ‑ke, ‑wɛe ɛɛ' -kao nɩɛ ɔ "jru. 3 ‑Bo nyɔ jrɔ' seɛ ‑kwlɩ" ‑te', ‑wɛe dɛ wlʋa 'de nyɔ ‑pʋn", ‑ɛ sea i ‑kwɛ ɔ jeɛ "i bla, ‑bo ɔ juo nɛ ɛ, ‑mɛ ɔ mɔ kpʋɛ ‑flɛn" ‑ke, ‑mɛ ɔ nʋɛ dɛsaʋn. 4 ‑Bo nyɔ jrɔ' se tɔ' i naa, ‑wɛe ɔ 'je dɛ jrɛ' 'ɛ wlu ‑tie" cɛn, ‑bo ɛ nʋɔ 'dɔe "jrii o, ‑bo ɛ se ɔ 'dɔe "jrii nʋ o, ka "oo ka ɛ nɩ o, ‑bo ɛ 'kpɔ 'di 'sʋɛ, ‑mɛ ɔ nʋɛ dɛsaʋn. 5 Nyɔ ‑ɔɔ mua dɩsaɩn ‑nɩ ɩa' dee jrɛ' nʋa', ɔ 'jɩ wɔn -sa. 6 ‑Mɛ dɛ ɔ 'jea ja, ɔ 'jea 'sraa 'ʋn ‑saa, ɔ 'jea Nyɔsoa "nyɩ 'de ɔɔ' dɩsaɩn 'a ‑tɩ' 'ʋn ɛ, ‑bo ɛ se 'blae nynɔ nɩɛ, ‑mɛ ɛ nɩ gbao nynɔ, ɛ mɛ ‑je ɔɔ' dɛsaʋn 'a 'sraa dɛ nɩ-. 'Kamɔ Sraa ‑sai 'je ɛɛ' dɛsaʋn 'a ‑kwɛa 'a 'sraa tu ‑sa.7 ‑Bo ɔ se dɛ 'jea 'bɛɛ -wɛe ɔ 'je 'blae nynɔ ke, gbao nynɔ ja a, ‑Bo ɛ se ''pau 'sɔɔn nɩ -mɛ -gbɔlɛ' 'sɔɔn mɛ ɔ 'je Nyɔsoa ja ‑ɛ ‑je ɔɔ' dɛsaʋn 'a ‑kɔi" nmae-. Due' 'je dɛsaʋn 'a -kwɛa' 'a 'sraadɛ nʋ, -wɛe due' 'je 'sraadɛ ‑ɛ ‑wee' nɛ ɛ dia nʋ. 8 Ɔɔ muɛ kɩ nɩa 'sɔɔn 'sraa -sai jaa', ‑wɛe -mɔ 'je dɛsaʋn 'a -kwɛa' 'a sraa ‑sa, "i ‑saa "nɔ. Ɔɔ muɛ ɛɛ' 'kle "i waa', 'kaa ɔ se ɛɛ' "jru 'e cɛn i 'pepe, 9 'sraa ‑sai 'je ɛɛ' nmɔ "kpa 'a 'fɔ due' blaa‑ ‑wɛe ɔ 'je ɛɛ' nmɔ tɔo ‑sia 'emu i 'wla 'de "kpa ‑sɔn. Ɛ nɩɛ dɛsaʋn 'a ‑kwɛa' 'a 'sraa ‑o. 10 Ɛɛ' 'sɔɔn -nɛ ‑jɛ ‑sia 'e ɛ, ɔɔ muɛ 'sraa ‑jɛ ‑ɛ ‑wee' nɛ dia 'ʋn ‑saa', ka nyɔ nʋa see ɛ. 'Kamɔ 'sraa ‑sai 'je ɔɔ' dɛsaʋn 'a ‑kwɛa' 'a 'sraa ‑sa, ‑wɛe ɩ 'je "kpei -kwɛɛ.
11 ‑Bo ɔ se "pau 'sɔɔn 'dewlɛ -gbɔlɛ' 'sɔɔn 'je 'a bɛɛ‑ 'de ɔɔ' se dɛ 'ble 'a -tɩ' 'ʋn, ‑mɛ 'de ɔɔ' dɛsaʋn 'a ‑tɩ' 'ʋn, ɔ ja fai' pʋ ‑ɛ ‑nmɔa "jrii 'pepe 'a "cio taan, ‑wɛe ɔ 'je ɛɛ' 'sraa ‑sa. Ɔ 'bo 'cna ke paifɛn' 'e po ɛ, dɛ dɛ‑nʋɛ' ɛ nɩɛ dɛsaʋn 'a -kwɛa' 'a 'sraa ‑o. 12 Ɔɔ muɛ 'sraa ‑sai jaa', ‑wɛe ‑mɔ 'jeɛ kwa "jii ɔ 'jeɛ "jri po 'de "kpa "kpei, 'de dɩ nyʋ -sa kwai nyʋ "nyɩa Nyɔsoa "kpei, ‑wɛe ɛ 'je 'sraa nyʋ "nyɩa Nyɔsoa 'a -tɩ' -kwlʋ o podɛ nɩ-, ‑ɛ ‑wee' nɛ dia nɩ, ɛ nɩɛ dɛsaʋn 'a ‑kwɛa' 'sraa ‑o. 13 'Sraa ‑sai a muɛ ɛɛ' dɛ tu nʋa', 'de "ju ‑nɩa 'mʋʋa- "kpei -wɛe Nyɔsoa 'je ɔɔ' dɛsaʋn -kɔ', -wɛe Nyɔsoa -kɔ' ɔɔ' dɩsaɩn 'a kpɛ ‑nɩa 'mʋʋa-. 'Sraadɛ 'ɛ tɔo ‑sia 'e ɛ, 'sraa ‑sai ‑bleɛ, ka 'sraadɛ -wlʋa 'de 'blʋ 'ʋn nɩa -ke.
-Kɔ "i nmae 'a 'sraa
14 Nyɔsoa wluɛ Moisɩ ‑pee ɛ na: 15 ‑Bo nyɔ jrɔ' se ɔɔ' ‑cɛ" ''jriɛ o sie, ‑wɛe 'sraa dɩ ‑teea kpɔ "i 'de Nyɔsoa 'a ‑tɩ' 'ʋn ɔ 'je ɩa' kɛ' ‑saa 'de ɩa' jrɩ 'je ɔ 'kwa sie ɛ, ‑mɛ ka ɔ 'jea nʋ 'ka ka, 'dɛ ɔ 'jea ja ‑wɛe ɔ 'je ɔɔ' ‑kɔ "i nmae ɛ, ɛmɛ ‑nɩ 'blae ‑gblɔ -kɔ sea -pʋn" nɩ ɔ ‑sa 'e ɔɔ' "nɔdɛ- "klu, ɛ nɩ ka dɛ 'ɛ sɔɔn' nɩa 'de ‑gbɛɛna', ɛmɛ ‑ɛɛ 'sraa 'je ɔɔ' ‑kɔ "i nmae. 16 'De ‑mɛ 'de ɛ, 'de dɛ ‑ɛɛ -tɩ' 'ʋn ɔ ‑saa kɛ', ‑bo ɔ 'je ɛɛ' kpan ‑sa a, ‑bo nyʋ ‑seeɛ 'ʋn kpɛ ‑mm", ‑mɛ ɛɛ' due' mɛ ɔ 'jeɛ "kpei ‑te', 'de dɛsaʋn ɔ nʋa 'e ‑gbɛɛna' "i 'mʋʋa- 'a ‑tɩ' 'ʋn. ‑Wɛe ɔ 'jeɛ 'sraa ‑sai "nyɩ, 'de -mɔ 'je 'blae ‑gblɔ ‑nɛ -kɔ "i nmae sraa 'ʋn nʋ, ‑wɛe Nyɔsoa 'je ɔɔ' dɛsaʋn -kwɛ'.
17 ‑Bo nyɔ jrɔ' se ɔɔ' ‑cɛ" "jriɛ o sie, ‑wɛe dɛ Nyɔsoa 'a kɛ' 'na nyʋ 'bo nʋɛ, ‑wɛe ɔ 'jeɛ nʋɛ, ‑mɛ ɔɔ kpʋʋn ɛ ɔɔ' ‑cɛ" 'pee, ɔɔ' dɛsaʋn 'a ‑gbɛ nɩɛ ɔɔ' ‑cɛ" "jru. 18 Dɛ ɔ 'jea ja ‑ɛ ‑jea 'sraa 'ʋn ‑saa, ‑wɛe ‑ɛ ‑jea ɔɔ' ‑kɔ "i nmae ɛ, 'blae ‑gblɔ ‑kɔ sea ‑pʋn" nɩ, -ɛ -wlʋa 'e ɔɔ' "nɔdɩ "klu, ka ɛɛ' 'sɔɔn nɩa 'de -gbɛɛna'. ‑Wɛe 'sraa ‑sai 'je ɔɔ' dɛsaʋn ɔ sea "jrii 'jee ɔ nʋa 'a 'sraa ‑sa, ‑wɛe Nyɔsoa 'je ɔɔ' dɛsaʋn -kwɛ'. 19 Ɛ nɩɛ nyɔ 'ɔ ‑kɔ "i nmae 'a 'sraa ‑o, dɛ dɛ‑nʋɛ' "ju nɩa 'mʋʋa‑, kpʋʋn ɛ ɔɔ' ‑cɛ" 'pee ‑cɛɛn' ‑cɛɛn'‑ 'de Nyɔsoa "juɛi.
20 Nyɔsoa wluɛ Moisɩ ‑pee ɛ 'na: 21 ‑Bo nyɔ jrɔ' se Nyɔsoa wɔn 'je, ‑wɛe ɔ 'je ɔ ‑ponyiɔ dɛsaʋn "jrii nʋɛ: ‑Bo ɔ dii ɔ sɩ wɔn, 'de dɛ ʋn ‑tea' i 'de ɔ 'kwa o, dɛ ɔ kpʋan 'kpan o, ‑bo ɔ "jriɛ o, ‑bo ɔ di ɔ "jru i o, 22 ‑Bo ɔ di sɩ 'de dɛ jrɛ' ɔ 'tean 'a ‑tɩ' "kpei, 'de ɔ cɛn dɛ jrɛ' ‑ɛ -bɛɛ' a nyʋ dɛsaʋn "jru ‑teea' wlu ‑tie" i, 23 Ɔ nʋɛ' dɛsaʋn 'a 'pee kpʋn ɔ', dɛ ɔ "jri a o, dɛ ‑ɛɛ "kpei ɔ dii a nyʋ "jru i, dɛ ʋn siɛ ɔ o 'mʋʋa-, ɔɔ muɩ toa', 24 ‑Bo ɛ nɩ dɛ "klein ‑ɛɛ wlu ɔ cɛan ‑tie" o, ɔɔ muɛ ka ɛ ‑wee' "klein ‑tia toa', ‑wɛe ka ɛɛ' sɔɔn' ‑tia, ‑bo nyɔ ‑seeɛ 'ʋn kpɛ ‑mm", ɔ 'je due' de ɛ "kpei ‑te'. 'Wɩ ‑ɛɛ 'di ɔ juuɛ ka ɔ nʋa dɛsaʋn ɛ, ɛmɛ ɔ 'jeɛ de kpa 'de ɛɛ' jei o. 25 Dɛ ɔ 'jea ja ɔ 'jea 'sraa -sai "nyɩ, ‑wɛe ɔ 'jea ɔ ke Nyɔsoa 'nynɩ nmae ɛ, ɛmɛ ‑nɩ 'blae ‑gblɔ -kɔ sea -pʋn" -nɩ ɔ ‑sa 'de ɔɔ' 'blae "klu, ka ɛɛ' sɔɔn' nɛa 'de -gbɛɛna' 'de ɔɔ' -kɔ "i nmae sraa -tɩ 'ʋn. 26 'Sraa ‑sai a muɛ ɔɔ' dɛsaʋn 'a ‑kwɛa 'a 'sraa ‑saa' 'de Nyɔsoa "juɛi, dɛsaʋn ɔ nʋa ‑ɛɛ 'pee kpʋn ɔ -wɛe Nyɔsoa 'jeɛ "kpei 'wlʋ.